Libera Geoparkea proiektuaren barruan, Metro koadro bat Deba ibaiaren alde izenburua daraman hondakin bilketa egin zen martxoaren 14an. Antolatzaileek azaldu dutenez, 18 pertsonak, 7 umek eta 11 helduk, parte hartu zuten Artzabalgo padura bueltan pilatutako hondakinak jasotzeko boluntariotza jardunaldian.
Debanatura Ingurumen Heziketa elkarteak antolatu zuen hitzordua eta emandako datuen arabera, 120 kilo inguru zabor jaso zituzten. "Denetik" bildu zutela adierazi du Diego Mendoza elkarteko arduradunak. "Plastikozko botilak eta edari latak izan ziren gehienbat eta, horrekin batera, plastikozko zati txikiak zein handiak". Bestelako hondakinak ere topatu zituzten, hala nola obretako hondakinak (kableak eta hodiak), kartutxoak, burdinazko zatiak eta poltsak, beste gauza askoren artean.
Eta hondakin mota batzuekin "harrituta" geratu zirela nabarmendu du Mendozak. "Hezeguneen Munduko Egunean bildutakoarekin alderatuta, askoz ere poliespan gehiago batu genuen".
Zabor bilketari buruzko balorazio positiboa egin du Debanaturako kideak eta lanean jarraitzeko konpromisoa adierazi du, baina administrazioen inplikazio handiagoa eskatu du. "Arazo hau Debanatura elkartearen eta herritarren esku lagatzea da ez da bidezkoa".
Zuhaitz landaketa
Hondakin bilketaren ondoren, zuhaitz landaketa ere egin zuten, "ibaiertzeko berezko landaretza berreskuratzeko eta reinutria japonica izeneko landare inbaditzaileari aurre egiteko".
Hogei zuhaitz eta zuhaixka landatu zituzten guztira, Errotazarretik hurbil dagoen ibaiertzeko eremu batean. "Zumarrak, lizarrak, urkiak, zumeak, haltzak, basa madariondoak, zuhandorrak eta basaerramuak landatu genituen".