Euskaraldia gerturatu ahala, herritarren motibazioa sustatzeko hamaika ekimen egingo dira Euskal Herrian, eta Debako herri batzordeko kideak ere mugimendua sortu nahian dabiltza lanean.
Proposamen berritzailea aurkeztu berri dute: Euskaraldiko kuadrillen arteko jolasak. Azaldu dutenez, "herriko kuadrillak Euskaraldira gogotsu iristea" da ekimenaren helburu nagusia. Horretarako, bi dinamika antolatuko dituzte. Batetik, jolas presentzialak egingo dira; eta, bestetik, kuadrillen arteko lehiaketa jarriko dute abian.
Jolas presentzialetan edonork parte hartu dezake (taldean edo banaka). Martxoaren 28an, apirilaren 4an eta apirilaren 11n egingo dira saioak, Plaza Zaharrean, 20:00etan hasita.
Lehiaketak, berriz, hiru asteko iraupena izango du, apirilaren 25etik maiatzaren 15era. Aste bakoitzean (ostegunetik ostegunera) hiru erronka bete beharko dituzte partaideek, ahalik eta puntu gehien lortzeko helburuz, eta Debarren Egunaren bezperan, maiatzaren 17an, jokatuko da aurrez aurreko finala.
Antolatzaileek ohartarazi dute lehian parte hartu nahi duten lagun taldeek izena eman beharko dutela aurrez. Martxoaren 28an hasi eta apirilaren 24an amaituko da izen-ematea, labur.eus/kuadrillakeuskaraldia estekan.