Ander Larraburu sunbillarrak irabazi du kadete mailako 33. Deba Saria. Erro y Eugui-Arga Carretilla taldeko kidea izan zen larunbatean helmugara iristen lehena. 52 kilometroko ibilbidea osatzeko 1:20:16 denbora behar izan zuen.
Ohi bezala, Hondartza kalean amaitu zen proba, eta bertaratu zirenek emozio handiko bukaera ikusteko aukera izan zuten. 67 laguneko tropel handi batek egin zuen irabazteko ahalegina, baina hiru izan ziren saria eraman zutenak. Larrabururekin batera, Jon Errazkinek (Lurkide-Aranur) eta Amets Egurenek (Cafe Dromedario-Flotamet) osatu zuten podiuma.
Eroriko asko
Euria eta erorikoak izan ziren eguneko protagonista nagusiak. 200 txirrindulari inguruk hasi zuten proba, baina gutxiagok gurutzatu zuten helmuga; zehazki, 101ek amaitu zuten. Zaurituak izan ziren han eta hemen. Azken metroetan, esaterako, anbulantziek hainbat txirrindulari artatu behar izan zituzten.
