Abian da Debako Udalak Zuhatza Euskara Elkarteko Kolore Anitz Aisialdi Taldearekin elkarlanean antolatutako Bastiñuixan ekimena. Martxoko ostiraletan izaten dira saioak, zumardiko kioskoan (euria eginez gero, Ifar kaleko patioan); gaur arratsaldean egingo dute hirugarrena, eta hilaren 28an izango da azken hitzordua.
Kaleetan eta parkeetan euskararen erabilera sustatzea da egitasmoaren xedea. Eta, antolatzaileek gogorarazi bezala, jolas-saioetan familiek parte hartu ahal izango dute, haurrek eta gurasoek, alegia.
Ekimenaren baitan bi programa eskainiko dira:
ESKUBIDUBIDU
Saioak 16:30etik 17:30era izango dira, eta 3-5 urte bitarteko haurrak dituzten familiei zuzenduta daude. Helburua haurrei euskaraz jolasteko tresnak eta baliabideak eskaintzea da. Umeek guraso edo heldu baten laguntzarekin parte hartu beharko dute.
KINKINETAN
Saioak 17:30etik 18:30era izango dira, eta 6-9 urte bitarteko haurrei zuzenduta daude. Programa honek ere haurrei euskarazko jolasen inguruan trebatzeko eta horiez gozatzeko aukera ematen die.