Umetan murgildu zen judoan Jon Montiel. 9 urterekin hasi zen entrenatzen, Manu Agirre zenaren esanetara, eta hainbat urtez lehian aritu ondoren, 2010ean utzi zuen, lesio baten ondorioz. Tatamitik urrun eman ditu hainbat urte, judogia jantzi gabe, baina gogoz itzuli da hainbeste momentu on eman zizkion kirol horretara. Orain berriro jarri du martxan Ekiberri Kluba eta, aldi berean, hirugarren Dan maila eskuratzeko azterketa prestatzen ari da.
Zergatik erabaki duzu kluba berriro martxan jartzea, urteetako geldialdiaren ostean?
Duela pare bat urte hil zen, 2022ko azaroan, Manu Agirre Ekiberri Klubaren sortzailea. Herritar askoren irakasle izan zen, eta, egia esan, ahalegin handia egin zuen herrian arte martzial hori bultzatzeko. Lesio baten ondorioz, aspaldi utzia nuen kirola, baina Manu hil zenean, berriro praktikatzen hasteko gogoa piztu zitzaidan; neure buruari zor nion zerbait zen. Irakaslea naiz eta eskolak ematen ditut hainbat lekutan, eta Manu Agirreren omenez judoa sustatzeko ahalegina egin behar nuela iruditu zitzaidan. Izan ere, kluba desagertu zenetik, 2006. urte inguruan, ez da egon herrian kirol hori eskaintzen edo sustatzen duen talderik. Arrazoi horregatik erabaki nuen, hain zuzen, Ekiberri Klubaren proiektua berriz ere abian jartzea.
Bistan da arte martzial hau maite duzula. Zer toki eduki du judoak zure bizitzan?
Haurtzaro eta gaztaro osoa eman nuen judoan. Ia astebururo ibiltzen nintzen Manurekin, batera eta bestera, lehian. Urte asko eman ditut praktikatu gabe, baina duela urtebete jiu-jitsuan hasi nintzen eta tatamira igo nintzen unean zirrara berezi bat sentitu nuen gorputz osoan. Judoarekin bizi izan nituen momentu on guztiak etorri zitzaizkidan burura eta argi izan nuen berriro heldu behar niola. Egia esan, une hori erabakigarria izan zen abiatu berri dudan proiektua martxan jartzeko. Gainera, orain buru-belarri ari naiz entrenatzen, eta duela gutxi hasi naiz hirugarren Dan maila eskuratzeko azterketa prestatzen ere.
Irakaslea naiz eta eskolak ematen ditut hainbat lekutan, eta Manu Agirreren omenez judoa sustatzeko ahalegina egin behar nuela iruditu zitzaidan
Zuk bakarrik heldu diozu Ekiberriren proiektuari edo beste norbaiten laguntza izan duzu bidean?
Nire buruan neukan zerbait izan da. Beraz, bakarrik murgildu naiz proiektuan. Beste hainbat lekutan bezala, Ikigai zentroan ere eskolak ematen ditut, eta toki egokia iruditu zitzaidan egitasmoa berriz ere Deban abiatzeko. Aurten tatamia jartzea erabaki dugu eta horrek judo eskolekin hasteko aukera eman dit.
Zein da zure helburu nagusia?
Ekiberrik bere garaian izan zuen distira hura berreskuratzea gustatuko litzaidake. Kluba oso ezaguna izan zen herrian, eta adin batetik gorako jende askok badu haren berri. Sasoi batean, ume ugari ibili ziren bertan, eta urte haietan jende askok izan zuen harremana bai klubarekin bai Manurekin. Bestalde, beste helburuetako bat Deban kirol eskaintza handitzea da.
Martxan hasita zaudete dagoeneko?
Bai, urtarrilean hasi ginen, eta 6 eta 12 urte bitarteko bi haur talde ditugu, momentuz. Ni oraindik ere 'birziklatze prozesuan' nagoenez, Hegoi Esteban Manuren lagun eta Eibarko Kalamua Judo Taldeko arduradunak ematen dizkie umeei eskolak. Saioak ostiraletan izaten dira, baina datorren ikasturtean eskaintza zabaltzea da gure asmoa. Izan ere, asteburuen atarian egonik, ostiralak ez dira egun aproposenak izaten; eskolak beste egun batzuetan ere eman nahiko genituzke, eta maizago.
Zeintzuk izango dira hurrengo urratsak eta etorkizunerako erronkak?
Gustatuko litzaidake ikasleek, denborarekin, lehiaketetan eta txapelketetan parte hartzea, guk txikitan egiten genuen bezala. Federazioaren egutegian hainbat txapelketa daude aurreikusita, eta helburua pixkanaka horrelako hitzorduetarako prestatzea litzateke. Bestalde, ondo legoke klubaren eskaintza gazteei eta helduei ere zabaltzea.
Proiektua aurkezteko ekitaldia prestatzen ari zarete. Ez da, ordea, ekitaldi arrunta izango. Zer aurreratu dezakezu?
Aurkezpena martxoaren 29an egingo dugu, 11:00etan, Ikigai zentroan (Zesterokua Plaza, 2). Lehenik eta behin, egungo proiektuaren helburua azalduko dut, eta, ondoren, udalerriko aurreko klubeko sortzaileek beren ibilbideaz hitz egingo dute: sorrera, hastapenak, bilakaera... Amaitzeko, Manuri omenaldi txiki bat egingo diogu eta bertaratzen diren herritarrei hamaiketakoa emango diegu. Ekitaldi berezia izango da, bai. Omenduaren alarguna eta Gipuzkoako Federazioko kideak ere gonbidatu ditut, eta asko gustatuko litzaidake Manurekin harremana izan zuten guztiak hitzorduan izatea. Horregatik, aurkezpenera joan nahi duen orok ateak zabalik izango dituela gogorarazi nahi dut.