Beste urte batez, Debabarreneko Zaporeak erronka egingo dute aurten ere. Helburu argia du ekimenak: Lesboseko (Grezia) kanpalekuetan dauden errefuxiatuei janari duina ematen jarraitu ahal izateko elikagaiak eta dirua biltzea. Egitasmoaren zazpigarren edizioa izango da eta 50.000 kilo janari batzeko erronka jarri diete herritarrei; hau da, iaz lortutakoaren bikoitza.
Bilketa aste honetan egingo da eskualdean, gaurtik martxoaren 28ra bitartean, hain zuzen, eta herri bakoitzean elikagai jakin bat bilduko dute. Deban, arroz luzea jasoko dute Lizaso eta Eroski supermerkatuetan, baita Luzaro ikastetxean ere. Gainera, aipatutako leku horiei beste bilketa gune bat gehituko zaie azken egunean. Zehaztu dutenez, hilaren 28an (18:00etatik 20:00etara), boluntarioak udaletxe azpiko arkupeetan egongo dira arroz luzea batzen.
Tuper solidarioa
Erronkari amaiera emateko, tuper solidarioa egingo dute hilaren 29an. Jaialdia Ermuko Orbe Kardinalaren Plazan izango da, 14:00etatik 15:00etara.