Gure esku egon ez arren, 2024ko denboraldian atsedenaldi txiki bat hartu behar izan genuen, baina Debako txirrindularitza arloko kideok lasterketak antolatzen hasiak gara berriz ere. Beraz, gutun honen helburua herritarrei aurten egingo ditugun lasterketen berri ematea da, eta, bide batez, laguntza eskatzea.
Bihar (martxoak 22) kadete mailako txirrindulari gazteentzako lasterketa izango da; 10:40ean hasiko da eta partaideek Bergararainoko joan-etorria egin beharko dute (52 kilometro).
Martxoaren 29an, aldiz, junior mailako txirrindulariak batuko dira 49. Amaikak Bat Proban; 86 kilometroko lasterketa egingo dute, 10:15ean hasi eta 12:30ean amaituz.
Eta hirugarren hitzordua apirilaren 27an izango da, proba zikloturista jokatuko baita, 08:00etatik aurrera.
Aipatutako lasterketak aurrera eraman ahal izateko jartzen dizkiguten exijentziak gero eta handiagoak dira, eta herritarren laguntza ezinbestekoa da antolakuntzan. Bidegurutzeetan laguntzeko boluntarioak behar izaten ditugu, adibidez, guztia ondo lotu eta txirrindulariek minik hartu ez dezaten.
Antolaketan laguntzeko prest baldin bazaudete, jarri harremanetan txirrindulari taldeko edozein kiderekin, mesedez, ezagutuko duzue norbait eta... Mila esker!