Kadete mailako 33. Deba Saria txirrindularitza proba jokatuko da larunbatean (martxoak 22), Gipuzkoako txirrindularitza federazioak Amaikak Bateko Txirrindularitza Elkartearen laguntzarekin antolatuta.
Proba Debabarrenean eta Debagoienean jokatuko da. Parte hartzaileek 52 kilometroko ibilbidea osatu beharko dute eta, antolatzaileen esanetan, guztira 200 txirrindulari inguru izango dira.
Irteera neutralizatua 10:40ean egingo da Foruen Plazatik, eta irteera ofiziala N-634 errepidean izango da, Mendarora bidean. Aurreikuspenen arabera, lehenengo sailkatua 12:05ak inguruan iritsiko da helmugara. Sari banaketa Foruen Plazan izango da, 13:15etik 13:45era bitartean. Euria eginez gero, ekitaldia udaletxeko arkupeetan egingo da.
Trafiko etenak
XXXIII. Deba Sariaren ospakizunak trafiko etenak eragingo ditu. 09:00etatik 14:00etara bitartean, ezin izango da ibilgailuarekin alde zaharreko kaleetara sartu.
Lasterketa N-634 errepidetik igaroko da, eta larrialdi arrazoiengatik izan ezik, ibilgailuek ezin izango dute bertako garajeetara sartu-irtena egin lasterketa amaitu bitartean.
'Fibromialgia abordatzen' egitasmoa
Egun berean, Beñat Garciak sustatutako Fibromialgia Abordatzen ekimena herritik igaroko da. Ekimenaren helburua zera da: fibromialgia gaixotasuna ezagutaraztea, giharretako min orokorra eragiten duen gaixotasun kronikoa, hain zuzen.
Beñat Garcia da ekimenaren sustatzailea eta Gipuzkoa zeharkatzeari ekingo dio bihar (martxoak 21), Donostiatik Asteasurako ibilbidean herri desberdinak zeharkatuz; horien artean, Deba. 13:00etan helduko da udalerrira eta nahi duenak Debatik egingo duen korrikaldiarekin bat egin ahal izango du, norberak bere gaitasunen arabera.
Bestalde, Fibromialgia abordatzen ekimenaren informazio karpa bat ere jarriko da Deban, Plaza Zaharrean. Bertan, jertseak eta kamisetak izango dira eskuragarri, eta gaixotasunari buruzko informazioa ere eskainiko da herritarrak sentsibilizatzeko.