Iruleak-eko bikoteak azpimarratu duenez, finala oso "borrokatua eta estua" izan zen, oso berdindua. "Final oso potentea izan zen; markagailua etengabe aldatzen zen bataren edo bestearen alde, eta emozioz beteriko partida izan zen".
Debarrek ez zuten hasiera ona izan, 6-0 galtzen hasi baitziren. Hala ere, jokoa egokituz, gustuko pilota aukeratuta eta sakea eskuratuta, 12na berdintzea lortu zuten.
Ondoren, markagailuan aurrea hartzea erdietsi zuten. "Aurrea hartzea lortu genuen, eta une batez partida gurea izango zela zirudien. 18-14 aurretik gindoazen orduan".
Partidaren azken zatian, berriz, aurkariek jokoaren norabidea aldatu eta erasora jo zuten, debarrei "min handia" eginez. Iruleak-eko bikotea gogor saiatu zen tantoak egiten, baina ahalegina ez zen nahikoa izan. "Huts asko egin genituen, tanto ugari galduz. Beren aurrelaria airez erasotzen hasi zen eta ez genuen hori geratzen asmatu. Hala ere, 27na geratu arte, oso ondo defenditzea lortu genuen. Azken hiru tantoak beren alde joan ziren, eta norgehiagoka 30-27 amaitu zen".
Txapela irabazi ez arren, "gustura" geratu dira egindako finalarekin. "Taldekide guztiok oso harro gaude egin dugun txapelketarekin".
