Deban bizi den kirolariak nagusitasunez irabazi zuen aurreko larunbatean (martxoak 15) Erandion jokatu zen Euskal Ligaren azken fasea. Garaipena lortzeko faborito nagusienetako bat zen, eta erakustaldia egin zuen beste behin ere.
Bakarka lehiatu zen BC1 kategorian, eta jokoan izan ziren partida guztiak nagusitasunez irabazita jantzi zuen txapela. Finalerdian, 8-2 gailendu zitzaion Hazten taldeko Laia Gonzalezi. Eta finala ere arazorik gabe irabazi zuen; 8-1 emaitzarekin, erraz hartu zuen mendean Kemen taldeko Mario Rodriguez.
Balio handia eman dio lortutakoari eta garaipenarekin pozik dagoela azpimarratu du Arrietak. "Honakoa nire bosgarren garaipena izan da Euskal Ligan, baina azken hau bereziki garrantzitsua izan da. Izan ere, oraintsu etapa berri bat hasi dut Iratxe entrenatzaile berriarekin".
Hurrengo hitzordua ekainaren 14an Torreviejan (Alacant, Espainia) jokatuko den Espainiako Txapelketa izango da, eta han du begirada Dordoka Klubeko kirolariak. Txapelketan lortutako emaitza onak hurrengo hitzordura "konfiantzaz gainezka" joateko balioko diola azaldu du. "Oso motibatuta nago. Nire hobekuntza egiaztatuta geratu da azken txapelketa honetan".