Debako Ostolaza udal liburutegiko Irakurketa Klubak beste saio bat egingo du martxoaren 25ean. Bertan, Audre Lorde olerkari eta ekintzaile afroamerikarraren El unicornio negro (The black unicorn) poema-liburua aztertuko dute, Ainhoa Aldazabalen gidaritzapean.
Saioa gaztelaniaz izango da eta, antolatzaileen esanetan, literatura, poesia eta pentsamendu kritikoa izango dira protagonistak. "Lorde feminismo afroamerikarraren idazle nagusietako bat izan zen. Bere bizitza eskubide zibilen aldeko defentsan eta arrazakeriaren aurkako zein emakumearen zapalkuntzaren aurkako borrokan oinarritu zuen".
Literaturari buruzko saioa, beti bezala, 19:00etatik 20:30era izango da. "Literatura, poesia eta hausnarketa kritikoa interesatzen zaien pertsona guztientzat irekia" izango dela gogoraraziz, bertan parte hartzeko deia egin diete herritarrei.
El unicornio negro
1978an argitaratua, El unicornio negro Lorderen lanik adierazgarrienetako bat da. "Gramatika eta genealogia propiotik abiatuta, 70eko hamarkadan Estatu Batuetan emakume afroamerikar eta lesbiana baten identitateen aniztasuna eta zapalkuntzak arakatzen dituen poema-liburua da".