Asteburu erabakigarria zuten aurretik Debako palistek. Izan ere, larunbatean (martxoak 15), Udaberri Txapelketaren nagusi mailako gizonezkoen larruzko paletako finala jokatu zuten Aldats pilotalekuan, eta herrian bertan geratu zen jokoan izan zen txapela.
Hasiera batean, Euskal Jolaseko bikoteak partida gogorragoa izango zela aurreikusi zuen, baina behin lehia hasita "oso ongi" moldatu zirela aitortu du Manex Prieto jokalariak. "Aurrez beren aurka jokatutako partida galdu egin genuen, eta beldur horrekin kantxaratu ginen. Hala ere, beti bezala, gure onena ematera irten ginen, eta badirudi horrek eragina izan zuela jokoan eta emaitzan".
Prieto eta Uranga indartsu aritu ziren hasieratik. Berehala hartu zuten aurrea markagailuan, eta lortutako abantaila horri eustea lortu zuten partidaren amaierara arte. "Aurkariek ere gu harrapatu nahian akats nabarmenak egin zituzten, eta horri esker tanto ugari pilatu ahal izan genituen".
Bikote debarrak nagusitasunez irabazi zuen. 35-21 irabazita, eta behin txapelak soinean, lortutako garaipenarekin pozik daudela azpimarratu dute Prietok eta Urangak.
