Agintaldiko lehenengo urtean, 1984an, egin zen lehenengo Tene Mujika Literatur Lehiaketa. Gerora, beka izatera pasa zen eta badakit oraindik ere mantentzen dela, baina lehiaketa bera etenda dago eta egoki litzateke formatu hura berreskuratzea.
Urte berriko barazki eta fruta lehiaketa, eta esne-behien eta oiloen lehiaketa ere garai hartan jarri genituen abian.
Ezin ahaztu udako musika kontzertuak ere, orain abuztuko ostegunetan egiten direnak; Euskadiko Orkestra, Felix Aio biolinarekin, Ainhoa Arteta, Joakin Atxukarro pianista... eta abar izan dira Deban. Gainera, musika eskaintza osatzeko, banda bat ekartzen genuen igandero. Zumaia, Ordizia, Eibar, Bergara, Irun... Igande bakoitzean banda bat etortzen zen eta musikariak herriko kaleetan ibiltzen ziren, herrian giro ederra sortuz.
Udal euskaltegiaren ibilbidea ere orduan hasi zen, baita pintura lehiaketarena ere. Bestalde, gaur egun ere lan bikaina eta garrantzitsua egiten duen Eguneko Zentroa jarri zen martxan, eta musika kontserbatorioa ere bai; harrezkero hain onuragarria izan dena.
Eta, besteak beste, gogoan dut kaleak garbitzeko gailuak (barredorak) eta udaletxean kontuak eramateko ordenagailua ere urte haietan jarritakoak direla. Ordenagailuekin kurtso digitalak ere eman genituen... Pentsa zenbat aldatu diren kontuak!
Herrian ez ezik, bailaran ere
Agintaldian egindako lanak eskualdean ere eman zuen fruitua. Aipatu beharra dago, adibidez, Debegesa Debabarreneko Garapen Ekonomikorako Elkartea 1985eko urriaren 23an eratu zela. Eta sasoi hartakoa da eskualde mailako Eibarko epaitegia ere, orduko herrietako alkateek hala bultzatuta.
Azkenik, Mendaroko Ospitalea nabarmendu nahi nuke. Garai hartan ekin genien zentroa zabaltzeko gestioei, inaugurazioa 1990. urtean egin bazen ere. Orduan ez zitzaion gaur besteko garrantzirik ematen proiektuari; gogoan daukat Eusko Jaurlaritzako mediku batek deitu zigula esanez bailara mailako ospitale batek ez zuela hemen indar berezirik izango, uste baitzuten anbulantziaren bat behar izatekotan, adibidez, nahiago izango zutela Donostiara edo Bilbora jo, eta ez Mendarora. Ez da, ordea, hala izan. Ez ziren Mendaroko Ospitalea sustatzearen aldekoak... Baina ikusi orain ze indar eta garrantzi daukan osasun zentroak eskualdean!
Harrezkero, ondorengo urteetan esan nahi dut, badira ondo gogoratzen ditudan beste ekimen garrantzitsu batzuk ere, tartean Zuhatza Euskara Elkartearen sorrerako aurkezpen ekitaldia bera ere... Baina elkarteak urte hauetan euskararen alde egindako lan guztia azaltzeak beste orrialde oso bat eskatuko luke idazlanean. Hurrengo batean agian.
Iñaki Elosua alkate zeneko artxiboko irudi bat, Itziarko Zabalsoro pilotalekuko inaugurazioan ateratakoa. ALLIKA