Bastiñuixan egitasmoaren saioa izango da gaur arratsaldean

Berriketan 2025ko mar. 7a, 10:19

Bueltan da berriz ere euskararen erabilera sustatzeko Bastiñuixan egitasmoa. Martxoko ostiraletan egingo dituzte saioak, eta gaur izango da lehenengo hitzordua.

Debako Udalak, Zuhatza Euskara Elkarteko Kolore Anitz Aisialdi Taldearekin elkarlanean, Bastiñuixan egitasmoa abiatu du berriz ere. Martxoko ostiraletan izango dira saioak, zumardiko kioskoan (euria eginez gero, Ifar kaleko patioan); gaur arratsaldean egingo dute lehenbizikoa, eta gainontzekoak hilaren 14an, 21ean eta 28an izango dira.

Kaleetan eta parkeetan euskararen erabilera sustatzea da egitasmoaren xedea. Eta, antolatzaileek gogorarazi bezala, jolas-saioetan familiek parte hartu ahal izango dute, haurrek eta gurasoek, alegia.

Ekimenaren baitan bi programa eskainiko dira oraingoan ere:

ESKUBIDUBIDU
Saioak 16:30etik 17:30era izango dira, eta 3-5 urte bitarteko haurrak dituzten familiei zuzenduta daude. Helburua haurrei euskaraz jolasteko tresnak eta baliabideak eskaintzea da. Horregatik, umeek guraso edo heldu baten laguntzarekin parte hartu beharko dute.

KINKINETAN
Saioak 17:30etik 18:30era izango dira, eta 6-9 urte bitarteko haurrei zuzenduta daude. Programa honek ere haurrei euskarazko jolasen inguruan trebatzeko eta horiez gozatzeko aukera ematen die.