Azaldu dutenez, federazioko arduradunek bertako eta inguruko udalerrietako familia ugariei arreta zuzena emango diete udaletxeko sarrerako harrera gunean (Portu kalea, 1), 09:30etik 14:00etara eta 15:00etatik 18:00etara.
Aurrez izena ematea ez da derrigorrezkoa, baina hitzordua hartzea gomendatu dute, itxaron beharrik ez izateko. Interesa dutenek honako galdetegia bete beharko dute.
Ondorengo gaiak azalduko dizkiete gerturatzen diren familiei:
- Familia ugaria izateagatik dauden eskubideak.
- Laguntzei/hobariei, baimenei eta abarri buruzko zalantzak argitzea.
- Seme-alabak hazteko eta mantentzeko laguntza berriari buruzko berrikuntzak.
- Familien Lege Berriaren aurreproiektuari buruzko informazioa.
- Zein laguntza/deskontu daude Deban?
- Udalerri honetako eta/edo gertuko familia ugarien egoera eta premiak.
- Federazioaren lana.
- Familien ekarpenak.
Hirukide, 1999tik
Federazioko kideek azaldu bezala, "Hirukide apolitikoa eta akonfesionala da, Eusko Jaurlaritzak 2003. urtean Onura Publikoko Elkarte gisa aitortua, bizitza politiko, instituzional, sozial, mediatiko eta enpresarialeko esparru guztietan kide ugariko familien eskubideen alde egiteko helburua duena".
Kide ugariko 8.300 familiak baino gehiagok (43.000 bazkide inguruk) osatzen dute gaur egun, eta bazkide izateko baldintza bakarrak dira Kide Ugariko Familia Titulua edukitzea edo eduki izana eta Euskal Autonomia Erkidegoan bizitzea. Egun, titulua indarrean duten familien %25 baino gehiago Hirukideren baitan daude.