Trapu zaharrak soinean eta zartaginak mailukadaz astinduz, desfile koloretsua eta zaratatsua egin zuten dozenaka haur, gaztetxo eta helduk larunbat iluntzean. Txarangako musikariak lagun, Agirre jauregiko plazatik abiatu zen kalejira eta, beti bezala, hartzak eta karro gainean zihoazen erreginek ere parte hartu zuten bertan.
Iragarrita zegoen bezala, hiru geldialdi egin zituzten. Berasaluze Plazan eta Plaza Zaharrean egindako lehen bi geldialdietan, azken urteko hainbat gertakariri buruzko errepasoa egin zuten pregoilariek. Eta ondoren, kaldereroen ohiko abestiak eta dantzak izan ziren nagusi.
Foruen Plazan amaitu zen ekitaldia. Azken pregoian, besteak beste, maiatzaren 15etik 25era egingo den Euskaraldian parte hartzera gonbidatu zituzten herritarrak. Beste hainbat dantza eta kantu abestu ondoren, hartzaren heriotza eta berpiztea irudikatuz amaitu zen aurtengo antzezpena.