Martxan da institutuko DBHko bi zikloetako ikasleei zuzendutako sariketa. Oraingo honetan, Bulego musika taldeko Tomas Lizarazu abeslari ezagunak aukeratu du literatur lehiaketarako gaia.
Ikasleek "Ze ederra zaren duda denak galdu eta dantzan hasten zarenean” esaldia gaitzat hartuta sortu behar izan dituzte sariketarako idazlanak (prosan zein poesian), eta datozen egunotan lau kidez osatutako epaimahaia arduratuko da gazteen lanak baloratzeaz. Antolatzaileek azaldutakoaren arabera, sariak apirilaren 11n banatuko dituzte, ikastetxean bertan egingo den ekitaldian.
Berez, bi sari banatzen dira DBHko ziklo bakoitzean; liburu elektroniko bat jasoko dute opari lehenengo saria irabazten dutenek eta liburuak erosteko 60 euroko opari txartela bigarren saria eskuratzen dutenek.