Debako Ostolaza udal liburutegiko Irakurketa Klubak berriro elkartzeko hitzordua ezarri du. Iragarri dutenez, otsailaren 26an izango da hurrengo saioa eta, arduradunek jakitera eman dutenez, Nerea Loiola idazle debarraren Zebrak eta bideak (Erein, 2024) azken lanari buruz eztabaidatzeko aukera izango da Asier Serrano literatur moderatzaile eibartarraren gidaritzapean.
Literaturari buruzko saioa, ohi bezala, 19:00etatik 20:30era izango da. Bertan parte hartzeko interesa dutenek aldez aurretik izena eman beharko dute udal liburutegian, 943 19 25 60 telefono zenbakira deituta edo ostolaza@deba.eus helbide elektronikora idatzita. Landuko den eleberria, bestalde, norberak eramatea eskatu dute.