Euskal Herriko Mus Txapelketako kanporaketa gaur jokatuko dute Deban

Berriketan 2025ko ots. 14a, 09:33

Gipuzkoako finala Deban jokatu zen 2023an. Arg.: Euskal Herriko Mus Federazioa

Euskal Herriko herri ezberdinetan jokatuko dituzte Euskal Herriko 16. Mus Txapelketako kanporaketak. Debakoa gaur (otsailak 14) izango da, Zalburdi tabernan (22:30ean). Momentuan bertan eman beharko da izena (20 euro bikoteko).

Abian da aurtengo Euskal Herriko Mus txapelketaren herriz herriko fasea, eta Debako kanporaketa gaur izango da, hilak 14. Zalburdi tabernan jokatuko da, 22:30ean hasita. Edonork parte hartu dezake txapelketan, eta izen-emateak egunean bertan egingo dira, bikoteko 20 euro ordainduta.

Antolatzaileek iragarri dutenez, hiru sari nagusi egongo dira jokoan gaur gauean:

  1. Txapela eta arkume erdi bana
  2. Garaikurra eta txuleta bana
  3. Gazta erdi bana eta ardo botila bana

Hitzordura begira, afaria ere izango da aukeran Zalburdin. Informazio gehiagorako ikusi hemen kartela.

Aurtengoa txapelketaren 16. edizioa da. Herriz herriko fasea ari da jokatzen orain, martxoaren 2ra arte, eta herrialdekako finalak martxoaren 22an jokatuko dira zazpi herrialdeetan. Gipuzkoakoa Itsasondoko Errota pilotalekuan jokatuko da martxoaren 22an. Herrialdeetako kanporaketa irabazten dutenek Euskal Herriko finala jokatuko dute apirilaren 5ean, Zigoitiako Gopegin (Araba).