Burdin Kurutz mendi taldeko kideak pozik azaldu dira 2024. urtearen balorazioa egiterakoan. Izan ere, ikasleentzako antolatzen dituzten irteeretan gero eta jende gehiagok parte hartzen duela nabarmendu dute.
Hileroko txango horiek dinamizatzen dituen Joxe Mari Altzibarrek azaldu duenez, hain zuzen, 60 pertsonatik gora batzen dira orain txangoetan. "Azken bizpahiru urteotan, gehienez ere 50 lagun izatera iristen ginen, ozta-ozta. Orain, ordea, Lehen Hezkuntzako lehenengo mailetako haurren guraso talde bat irteeretara etortzen hasi da, eta nabarmen handitu da partaideen kopurua".
Taldea "gaztetu" egin denez, ikasleen adinera egokitutako joan-etorriak antolatzen dituztela aipatu du Altzibarrek. "Antzeko irteerak egiten ditugu, baina 10 kilometro ingurukoak gehienez, eta ibilaldiak zailtasun maila errazekoak izaten dira orain".
Ikasturte berriarekin batera, irailean ekin zieten txangoei, eta antolatzaileak gustura daude orain arte egindako hitzorduekin. Otsailaren 16an egingo dute hurrengoa, Aitzorrotzera. Gogorarazi bezala, "ikasleak mendian gustura ibiltzea eta esperientzia errepikatzeko gogoz geratzea da irteeren helburu nagusia".