Geoparkeak bat egingo du abenduaren 11ko Mendien Nazioarteko Egunarekin aurten ere eta herritar guztiei zuzendutako ekimena antolatu du horretarako. Mutrikuko Zabiel Kultur Etxean egingo da hitzordua, 19:00etan. “Nazio Batuen Batzar Nagusiak aukeratutako data honek formazio natural horien garrantzia eta handitasuna nabarmentzea du helburu. Mendien edertasuna miresteaz gain, ekosistema osasungarrien mantentzean eta haien mende dauden komunitateen bizitzan duten eginkizunari buruz kontzientziatzeko ere balio du”, nabarmendu dute antolatzaileek.
Arratsaldeko saioan Udalatx. Ura eta atxa dokumentala ikusteko aukera egongo da. Ondoren, solasaldia izango da filmaren zuzendarietako batekin, Eñaut Iturberekin, eta Gipuzkoako Foru Aldundiko Basa Animali eta Landareen Zerbitzuko biologoa den Aitor Lekuonarekin. Asier Hilario Geoparkeko zuzendari zientifikoak zuzenduko du Mendiak, mendizaleak eta basa animaliak izenburuko hizketaldia.
Antolatzaileek azaldu bezala, saioa euskaraz egingo da eta sarrera doakoa izango da. Mendiek eskaintzen dizkiguten onurez ariko dira solasaldian, "eta, bereziki, mendizaletasuna kultura den herrialde honetan gure mendietako animali basatien egoera aztertuko da".
Iturbek eta Iban Ayesak zuzendutako dokumentalak 37 minutuko iraupena du, eta iazko Mendi Film Festival jaialdian estreinatu zuten. Bertan, zuzendariek Udalatx mendia babesteko deia egiten dute, “bizi izandakoengatik, bizi direnengatik eta biziko direnengatik”.
Ikus-entzunezkoan hainbat adituk parte hartu dute: Asier Hilario Euskal Kostaldeko Geoparkeko zuzendari zientifikoak, Alvaro Arrizabalaga EHUko prehistoriagile eta arkeologoak, Ana Ugalde EHUko historiagileak, Markel Arriolabengoa Errez kooperatibako baso ingeniari teknikoak, Ugutz Basauri geologo eta dibulgatzaileak, Martin Arriolabengoa Geologia saileko EHUko irakasleak, Ekaitz Aranburuzabala Besaide Mendizale Elkarteko kide eta espeleologoak, Naiara Corcuera Udaleko Ingurumen Eskolako kideak eta Mikel Velasco artzainak.