Santa Maria elizak Gipuzkoako Organo Zikloaren baitako saio berri bat hartuko du larunbatean (azaroak 23), 20:00etan. Artista gonbidatua Loreto Aramendi izango da eta, Debako Udalak iragarri bezala, garai eta estilo ezberdineko piezekin osatutako errepertorioa dakar organo-jotzaile oriotarrak Debara. "Eskainiko dituen pieza horiek Bruhns eta Buxtehude barrokoetatik abiatzen dira, Satie-ren erromantizismoan barrena, eta Philip Glass-en minimalismo garaikideraino helduz", aurreratu dute.
Donostiako Santa Maria Koro Basilikako Cavaillé-Coll organoaren organista titularra da Aramendi, eta aski ezaguna da, besteak beste, "estilo musikal ugaritan erakutsi duen trebetasunagatik eta birtuosismoagatik".