Udal iturriek azpimarratu dutenez, emakumeenganako indarkeria (dela psikologikoa, ekonomikoa, fisikoa, sexuala, bikarioa...) emakumeen duintasunaren eta segurtasun fisiko nahiz moralaren aurkako eraso larria da; "ondorioz, giza eskubideen urraketa larri eta onartezina da".
Halako gertakarien aurrean, euskal jendarteak zein erakundeek duten erantzukizuna ere ekarri du gogora udalak eta egiturazko arazo horri erantzuna emateko berdintasuna behar-beharrezkoa dela ohartarazi du. "Hori dela eta, Debako Udalak norabide horretan lan egiten jarraituko du, jendarte berdinzale eta justuago bat lortzeko".
Hilketa matxista
31 urteko emakume bat eraila izan zen atzo (irailak 12) Bilboko Santutxu auzoko etxebizitza batean. Eusko Jaurlaritzako Segurtasun Sailak jakinarazi duenez, ustez, haren 34 urteko bikotekidea da hiltzailea. Etxean entzuten ziren oihuek ohartarazita deitu zuten bizilagunek larrialdi zerbitzuetara. Zerbitzuok bikotea bizi zen etxera iritsi zirenean, emakumea arma zuriz zaurituta aurkitu zuten, "lesio garrantzitsuekin". Lekuan bertan hil zen, zauri horien eraginez; Euskal Herrian aurten izan den hirugarren hilketa matxista da, eta 2003etik, 122.a.