Pare bat hilabete baino ez dira geratzen 23. Korrikari ongietorria egiteko eta, beste edizio batzuetan egin izan den bezala, aurten ere Korrika Batzordea eratu nahi dute herrian, euskararen aldeko ekimen erraldoiaren nondik norakoak azaldu eta antolakuntza lanetan elkarlana eta herritarren parte-hartzea sustatu nahian.
Funtsean, informazioa trukatu eta Korrikaren lekukoa eraman, ekimenen bat antolatu edota antolakuntzan lan egiteko prest dauden horien guztien ekarpenak entzuteko helburuarekin sortuko da, hain zuzen, batzordea. Asteazkenean, urtarrilaren 24an, egingo da lehenengo batzar irekia (18:00etan) eta aurrerantzean beste bilera batzuk egitea aurreikusten dute.
Sustatzaileek jakinarazi dutenez, Whatsapp talde bat ere sortu dute herritarren arteko komunikazioa errazte aldera eta bertan zabalduko dituzte deialdiak; interesa duen edonor batu daiteke taldera (labur.eus/debakorrikawhatsapp loturaren bitartez). Bestelako zalantza batzuk argitzeko edo ekarpenak egiteko, interesdunek zuzenean jo dezakete batzordeko kideengana, deba@korrika.eus helbidera edota 688 84 03 08 telefono zenbakira mezua bidalita.