Jon Artano kazetari zestoarrak irabazi du 2022ko Tene Mujika beka, Ameriketan ibilitako hainbat euskaldunen kontuak eta gure artean dabiltzan hainbat amerikarrenak kontatu nahi dituen proiektu batekin.
Euskal Herriko historia hurbilaz idazteko ez-fikziozko proiektuak saritzen ditu Debako Udalak eta Elkar argitaletxeak antolaturiko beka honek. Aurten aurkeztutako proiektuen artean Artanorena eman du irabazletzat Idurre Eskisabelek, Imanol Muruak eta Elixabete Garmendiak osatutako epaimahaiak, eta orain urtebeteko epea izango du kazetariak lana burutzeko, gero liburu gisa argitara dadin.
Bi parte izango ditu Anderik Ande izenburuko lanak: lehena, Joandakoez, Hego Amerikan gertatzen da, eta hara joandako hainbat euskal herritarren istorioak aletuko dizkigu: Argentina, Txile, Bolivia, Peru, Ekuador, Kolonbia eta Venezuelan kokatuak, besteak beste. Bigarren partea, Etorritakoez, gaur egun Latinoameriketatik gurera migratu eta garbiketa eta zaintza lanetan aritzen diren emakume gazteez arituko da. Elkarrizketa, kronika eta bidaia-liburuen osagaiak izango ditu kontakizunak.
Artano Kazetaritzan lizentziatua da, eta hogei urteko ibilbidea egin du hainbat komunikabidetan: irrati, telebista eta idatzizkoetan. 2016tik 2019ra bitartean Latinoamerikako berriemaile berezia izan zen EITBrentzat, eta hango esperientzia baliatuko du, besteak beste, liburua idazteko.
Iaz bi beka banatu zituzten Debako Udalak eta Elkarrek: Erika Lagoma eta Estitxu Fernandezek amatasunari eta feminismoari buruzko elkarrizketa sorta bat landu dute, eta Jon Abrilek emakumeen lanbideei buruzko ikerketa bat egin du. Biak ala biak argitaratu gabe daude oraindik.