Zaporeak erronkari esker Greziara bidaltzeko 12.000 kilo janari bildu dira Debabarrenean

Zaporeak erronkako arduradunek eskerrik beroenak eman dizkiete modu batean edo bestean parte hartu duten herritar guztiei; datorren urtean erronka berriarekin itzuliko direla aipatu dute.

Zaporeak erronkaren kanpaina ixteko martxoaren 25ean Ermuan egin zen ekitaldi arrakastatsuaren ondoren, atzo (martxoak 29) eman zuten ezagutzera Debabarrena mailan egin den kanpainaren emaitza, antolatzaile eta laguntzaileen partaidetzarekin Urkotroniken egindako ekitaldian: aurten estreinakoz eskualde osora zabaldu duten erronkari esker 12.000 bat kilo janari bildu dute eta honezkero ondo antolatuta eta paketatuta daukate guztia, Greziara bidaltzeko prest.

Horrez gain, bidalketa gastuei aurre egiten laguntzeko 8.000 euro inguru bildu dituzte, rifa eta bestelakoen salmentari esker, eta diru horri oraindik jasotzen ari diren donazioena gehitu behar zaio.

Horiek horrela, Debabarreneko Zaporeak erronkako arduradunek eskerrik beroenak eman nahi dizkiete ekimenean parte hartu duten herritar guztiei, eta datorren urtean erronka berriarekin itzuliko direla aurreratu dute.

Bestalde, gogoratu rifen zozketa larunbatean bertan egin zutela eta hauek dira saritutako zenbakiak: 3968 (afaria Sagarra jatetxean eta Maite Zanguituren artelana); 2817 (afaria Amatxi jatetxean eta Angel G├╝enagaren artelana); 2771 (afaria Mendiola jatetxean eta Cristina Azpiriren artelana); 3303 (afaria Kasinon eta Santi Entrenaren artelana); 0528 (afaria Belaustegi jatetxean eta Esteban Orozen artelana); 2275 (afaria Kontent jatetxean eta Elisabeth Egurenen artelana); 0148 (afaria Baratze jatetxean eta Mauri Martinen artelana); 3276 (afaria Salegi jatetxean eta Javier Allenderen artelana); 2826 (Ederto-Harakel elkarteak emandako produktu-sorta eta Esther Galarzaren artelana).